Maharashtra Free Scooty Yojana 2025 Fact Check Fake News : महाराष्ट्रातील मुलींना मोफत स्कूटी देणारी ‘फ्री स्कूटी योजना 2025’ सध्या महाराष्ट्रात सोशल मीडियावर मोठ्या प्रमाणावर चर्चेचा विषय बनली आहे. व्हॉट्सअ‍ॅपपासून फेसबुकपर्यंत अनेक पोस्ट्समध्ये सांगितले जात आहे की, राज्य सरकारकडून ग्रामीण भागातील १२वी उत्तीर्ण मुलींना मोफत स्कूटी दिली जाणार असून यासाठी लवकरच ऑनलाईन अर्ज सुरू होणार आहेत. योजनेचे नाव ‘मोफत स्कूटी योजना’ असल्याचेही म्हटले जात आहे.
या योजनेच्या पोस्ट्समध्ये दावा केला जात आहे की, 75% किंवा त्याहून अधिक गुण मिळवणाऱ्या मुलींना कॉलेजला जाण्यासाठी सरकारकडून मोफत स्कूटी देण्यात येणार आहे. तसेच, अर्ज प्रक्रियेबाबत, लागणाऱ्या कागदपत्रांची यादी, आणि सरकारी वेबसाइटचा उल्लेख करून लोकांना अर्ज करण्याचे आवाहन केले जात आहे.
मात्र, फॅक्ट चेक केल्यानंतर लक्षात येते की ही संपूर्ण योजना बनावट आहे. महाराष्ट्र शासनाच्या कोणत्याही अधिकृत संकेतस्थळावर किंवा अधिकृत निवेदनात अशा कोणत्याही योजनेची घोषणा करण्यात आलेली नाही. महाराष्ट्रात अशी कोणतीही योजना अस्तित्वात नाही.
महत्वाचे म्हणजे, सोशल मीडियावर फॉरवर्ड होत असलेल्या पोस्ट्समध्ये दिलेल्या वेबसाइट्स बनावट असून त्या वैयक्तिक माहिती — जसे की आधार क्रमांक, बँक तपशील, फोटो — मागत आहेत. सायबर गुन्हे शाखेनुसार, अशा प्रकारच्या बनावट योजनांच्या माध्यमातून फसवणूक होण्याची शक्यता असते आणि यापूर्वी अशा प्रकारे फसवून झाल्याच्या काही घटनाही घडल्या आहेत.
राज्य शासनाच्या महिला व बालकल्याण विभागाने नागरिकांना आवाहन केले आहे की, अशा कोणत्याही अफवांवर विश्वास ठेवू नका. योजनांबाबत अधिकृत माहिती मिळवण्यासाठी महिला व बालकल्याण विभागाच्या अधिकृत संकेतस्थळाला नियमितपणे भेट द्या.
सध्या तरी महाराष्ट्रात मोफत स्कूटी योजनेसंदर्भात कोणतीही अधिकृत घोषणा नाही. त्यामुळे जर कोणी पैसे मागत असेल, किंवा तुमच्याकडून वैयक्तिक माहिती मागवित असेल, तर त्वरित स्थानिक पोलिस ठाण्यात तक्रार करावी.
निष्कर्ष:
‘फ्री स्कूटी योजना 2025’ सध्या सोशल मीडियावर व्हायरल असली तरी ती महाराष्ट्र शासनाशी संबंधित नाही. अशा अफवांना बळी पडू नये आणि कोणतीही वैयक्तिक माहिती अधिकृत खात्रीशिवाय शेअर करू नये.
🔴 हेही वाचा 👉 वेळेपेक्षा १२ दिवस आधी दाखल झाला; बनला इतिहासातील सर्वात लवकर दाखल झालेला मान्सून.
