Maharashtra Rain Flood Relief Scheme 2025 : राज्यातील अनेक भागांमध्ये झालेल्या अवेळी पावसामुळे, अतिवृष्टी आणि पूरपरिस्थितीमुळे शेतकऱ्यांच्या शेती पिकांचे मोठे नुकसान झाले आहे. या पार्श्वभूमीवर, राज्य मंत्रिमंडळाने नुकताच एक महत्त्वपूर्ण निर्णय घेतला असून, शेतकऱ्यांना निविष्ठा अनुदानाच्या माध्यमातून आर्थिक मदत दिली जाणार आहे. २७ मे २०२५ रोजी झालेल्या मंत्रिमंडळ बैठकीत हा निर्णय घेण्यात आला आहे.
या निर्णयानुसार, ज्या भागांमध्ये अतिवृष्टी, पूर किंवा अवेळी पावसामुळे पिकांचे नुकसान झाले आहे, तेथील शेतकऱ्यांना राज्य आपत्ती प्रतिसाद निधी (SDRF) अंतर्गत मदत दिली जाणार आहे. SDRF हा निधी केंद्र व राज्य सरकारच्या ७५:२५ अशा अंशदानातून तयार केला जातो आणि नैसर्गिक आपत्तीमुळे बाधित झालेल्या नागरिकांना मदतीसाठी वापरला जातो.
काय आहे शासनाचा निर्णय?
तात्काळ पंचनामे करणे बंधनकारक: शेतकऱ्यांच्या नुकसानीची नोंद करण्यासाठी संबंधित यंत्रणांनी तात्काळ पंचनामे करावेत, असे स्पष्ट आदेश दिले आहेत.
खरीप २०२५ पासून नव्या निकषांचा अवलंब: खरीप २०२५ व नंतरच्या कालावधीसाठी केंद्र व राज्य शासनाने अधिसूचित केलेल्या नैसर्गिक आपत्तींमुळे होणाऱ्या नुकसानीसाठी नवीन दर व निकष लागू होतील.
पूर्वीच्या आदेशांना उच्चस्थानी ठेवणे: या नव्या निर्णयामुळे १ जानेवारी २०२४ च्या शासन निर्णयास अधिक्रमित करण्यात आले आहे.
तात्काळ अंमलबजावणीचे आदेश: नव्या शासन निर्णयाची अंमलबजावणी ताबडतोब करण्यात यावी, अशा स्पष्ट सूचनाही देण्यात आल्या आहेत.
या निर्णयामुळे अतिवृष्टी, पूर आणि अवकाळी पावसामुळे नुकसान झालेल्या शेतकऱ्यांना मोठा दिलासा मिळणार आहे. कृषी विभाग आणि महसूल यंत्रणेला यासाठी तत्पर राहण्याचे निर्देश देण्यात आले असून, वास्तविक नुकसान झालेल्या शेतकऱ्यांपर्यंत मदतीचा लाभ पोहोचवण्याचा शासनाचा प्रयत्न आहे.
हेही वाचा : या योजनेत केवळ ‘इतक्या’ महिन्यात होतात पैसे दुप्पट; जाणून घ्या व्याजदर, पात्रता आणि गुंतवणुकीची संपूर्ण माहिती.
