Maharashtra Monsoon Advances June 2025 : तब्बल तीन आठवड्यांच्या विश्रांतीनंतर राज्यात नैऋत्य मोसमी पावसाचा प्रवास पुन्हा सुरू झाला असून, मॉन्सूनने सोमवारी कोकण, मध्य महाराष्ट्र, मराठवाडा आणि विदर्भातील काही भागांपर्यंत हजेरी लावली आहे. हवामान विभागाने दिलेल्या माहितीनुसार, पुढील दोन दिवसांत संपूर्ण महाराष्ट्रात पावसाचा शिरकाव होण्याची शक्यता आहे.
विक्रमी वेगात सुरुवात, मग थांबा
यंदा मॉन्सूनने २४ मे रोजी केरळच्या किनाऱ्यावर विक्रमी गतीने आगमन केले होते. केवळ दोन दिवसांत तो सिंधुदुर्ग, मुंबई, पुणे, धाराशिवमार्गे मराठवाडा आणि विदर्भात पोहोचला. मात्र, २८ मेनंतर अरबी समुद्रातून येणाऱ्या वाऱ्यांच्या बदलत्या स्थितीमुळे मॉन्सूनची प्रगती अचानक थांबली होती.
आता कोणत्या भागांत पोहोचला?
१६ जून रोजी मॉन्सूनने मध्य महाराष्ट्र, मराठवाडा आणि विदर्भातील बहुतांश भाग व्यापला आहे. महाराष्ट्रासोबतच गुजरात, मध्य प्रदेश, छत्तीसगड आणि ओडिशाच्या काही भागांमध्येही मॉन्सूनने प्रगती केली आहे. सध्या या प्रवासाची सीमा भावनगर, वडोदरा, खारगाव, अमरावती, दुर्ग, चांदबली आणि सांधेड बेटांपर्यंत पोहोचली आहे.
पुढील पावसासाठी अनुकूल स्थिती
हवामान खात्याने वर्तवलेल्या अंदाजानुसार, सध्याचे वातावरण मॉन्सूनच्या पुढील प्रगतीस पोषक आहे. त्यामुळे पुढील ४८ तासांत उत्तर अरबी समुद्र, गुजरात, उर्वरित विदर्भ, मध्य प्रदेश, ओडिशा, झारखंड, बिहार आणि पूर्व उत्तर प्रदेशातही मॉन्सून पोहोचण्याची शक्यता वर्तवण्यात आली आहे.
शेतकऱ्यांसाठी दिलासादायक बातमी
मॉन्सूनच्या पुनःसक्रियतेमुळे शेतकऱ्यांमध्ये आशा निर्माण झाली असून, पेरणीपूर्व तयारी सुरू झाली आहे. विशेषतः कोकण, मराठवाडा आणि विदर्भात आज-उद्या पावसाचा जोर राहण्याची शक्यता आहे.
हेही वाचा : या योजनेचा लाभ कोणाला मिळतो आणि कोणाला मिळत नाही? येथे जाणून घ्या.
